ukberri.net

Athletic Futbol Taldeko ehunaka zale biltzen dituen Herri Norte Taldeak (HNT) antolatuta, errepresioaren aurkako jaialdia egingo dute larunbat honetan, azaroak 14, Itzubaltzeta gaztetxean. “Lagunak direlako gurekin nahi ditugu” lelopean, 20:00etatik aurrera, Distorsion, O.E.P. eta Ovariosvarios musika taldeek kontzertua eskainiko dute. Sarrera lau eurotan erosi ahal izango da gaztetxearen atean bertan. Izan ere, musikaz eta lagun arteko giroaz gozatzeaz aparte, baliabide ekonomikoak lortzea da jaialdiaren helburua, “Estatu espainola eta frantsesaren errepresioaren ondorioz kriminalizatutako eta preso hartutako” HNTko kide gazteren lagun eta senideek sakabanaketa politikari aurre egin ahal izateko. Zehazki, Iñigo Vallejo Franco basauritarraren lagun eta senideek Frantziako Fresnes kartzelaraino egiten dituzten bidaietan laguntzea dute xede. Vallejori 17 urteko espetxe zigorra ezarri zioten 1996an autobus bat erre zuelakoan. 2003tik aurrera, Frantziako hainbat espetxe ezagutu ditu. “Errepresioaren bidez, gazteriari hegoak moztu nahi dizkiote, aldarrikatzeari utz diezaion, lan politikoa bazter batean laga dezan. Gaur egun, euskal herritar ta ezkertiar usaina daukan edozer errepresioaren jomugan dago eta muntaia polizial-juridikoen bidez izorratu nahi gaituzte”, adierazi dute HNTko kideek.

zabaldu | bildu

LAB sindikatuko 45 ordezkari bildu ziren atzo Leioako Boulevardean NON DAGO JON? lelopean.

LAB sindikatuak hileko lehenengo ostiraletan Euskal Presoen Euskal Herriratzearen aldeko konzentrazioak egiten ditu aspalditik hona, hilero lekua aldatuz. Azken boladan, euskal presoen aldeko aldarrikapenarekin batera, NON DAGO JON? leloaren inguruan biltzen dira konzentrazioetan.

LABen eskualdeka daude antolatuta, eta egitura horretan Uribe Kosta, Txorierri eta Uribe Butroik osatzen dute hemengo ESKUMALDEA. Hileko lehenengo ostiraletan Euskal presoak Euskal Herriratzearen aldeko konzentrazioa egiten dute sindikatuko delegatuekin, hilero lekua aldatuz.

>> AUDIOA: LABen elkarretaratzea Leioan.mp3 [0:33m] (((koskairratia.info)))

Rubalcaba, non dago Jon??
Euskal presoak Euskal Herrira! Euskal presoak lantokietara!

zabaldu | bildu

ukberri.net

Lander Labajo Indabadarekin batera kaleratuko zuteneko albisteak eta, urteurrenetan gertatzen ohi denez, beterano eta nostalgikoen gogorapenek markatu dute aurtengo Indabada. Baina, larunbatean ospatu zen Algortako X. Indabada Mundialak aipatutakoak zein 500dik gora gazte batzea baino kontu garrantzitsuagoak izan ditu. Izan ere, Idoia Landaburu Brell Jarraiko militante algortarra zena 18 urterekin hil zenetik 10. urtemuga beteko da datorren ostegunean, hilak 5. Urteurrena gertu izanda senideengandik hurbil egon nahi izan zuten antolatzaileek. Hortaz, ehunaka gazteren aurrean, Idoia Jarraiko kidea omendu (mp3) eta etxekoei oroigarriak eman zizkieten. Bestalde, ohiko giro ona eta hainbat urteotan Koska irratiak egin ohi duen irratsaio berezia bezala, aurten ere udaltzainak eta identifikazioak izan ziren babajana handian. Argazkian, Idoiaren etxekoak oroigarriarekin.

Aurten, nobedadea, Bihotz Alain burutuko zuten festarako baimena eskatuta ez zeukatela gazteei gogoratzeko asmoz, Txorimalo gaztetxeraino hurbildu ziren tokiko poliziak. “Arazoak ekiditeko norbait identifikatu behar zela, funtsean”, Txorimaloko kideek adierazi dutenez. Baina hori ez zen izan Indabadaren identifikazio bakarra. Larunbat goizean, plazan jarritako propaganda miatu zuten udaltzainek eta “Herriak du indarra” lelopeko graffitia margotzen ari zirenei datuak hartu eta “jabego pribatuari kalteak egin izanaz” salatzeko. Bitartean, ertzainak plazaz kanpo itxaroten izan ziren.

zabaldu | bildu

ukberri.net/bl

Ostegun honetarako, azaroak 5, Egunkaria auziari buruzko hitzaldia antolatu du Sopelako Meñakoz Euskal Kultur Erakundeak. Iñaki Uria auziperatua hurbilduko da bertara eta, hitzaldia emateaz gain, bideo bat ekarriko du. Ekitaldia 19:30etik aurrera izango da, Kurtzio kultur etxe berrian (Mendieta kalean, Balearen parkearen ondoan). Gauzak horrela, herritar guztiak gonbidatu ditu bertan batzera Meñakoz kultur elkarteak. Antolatzaileen hitzetan, “Egunkaria auziarekin gertatzen ari diren zentzugabekeria guztiak ezagutzeaz gain, auzipetuei elkartasuna adierazteko modu bat izango da”.

Bitartean, azaroan bertan omen da hastekoa “Euskaldunon Egunkaria”-ren itxierari buruzko epaiketa, eta herrietan Egunkaria-ren aldeko taldeak sortzen hasi dira jada. Xabier Oleaga Erandioko semea, Martxelo Otamendi, Iñaki Uria, Txema Auzmendi eta Joan Mari Torrealdai epaituko dituzte auzi honen barruan. AVTk 14na urteko zigorra eskatzen du bost akusatuentzat.

Hilaren 11rako, asteazkena, Bizarra Lepoan Getxo udalerriko euskara elkarteak antolatu du hitzaldia, bertan Martxelo Otamendi izango dela. Ekitaldia 19:30etik aurrera izango da, Algortako Aldai Patronatuan. Ekitaldira joaterik ez duenak Tas Tas irratiak Otamendiri egindako elkarrizketa (mp3) hemen du eskuragai

“Euskaldunon Egunkaria”-ren epaiketari begira prestatzen ari diren herri batzordeei buruzko bideoa, “Berria” TeleBistak ekoiztutakoa:

zabaldu | bildu

115.066 izan da aurtengo furgonetaren sariduna suertatu den zenbakia

2009ko Elkartasun Zozketak dagoeneko badu zenbaki sauridun bat. 115.066 zenbakia izan da aurtengoa. Boleto hori duenak furgoneta bat eskuratuko du. Bestalde, eta zozketa honen baitan, beste hainbat sari banatu dira. Ordenagailu bat eta landa etxe batean egonaldia. Zozketa honen helburua presoen senideek espetxe politikaren ondorioz pairatzen dituzten kostu ekonomikoak arintzea da.

zabaldu | bildu

ukberri.net

Leioako Betiko ikastolako LAB sindikatuak egin bezala, Jagoba Terrones berangoztarraren atxiloketa eta espetxeratzea salatu ditu Bizarra Lepoan Getxo udalerriko euskara elkarteak. “Zuetako askok aukera izan duzue berarekin egoteko toponimia-ibilbideetan. Bizarra Lepoaneko batzordeko kideok atxiloketa hau salatu nahi dugu eta Jagobari, bere familiari zein lagunei elkartasuna adierazi nahi diegu”, adierazi dutenez. Bestalde, Terronesek “lan politikoa eta publikoa” egiten duela nabarmendu du euskara elkarte getxoztarrak. Horrexegatik, “bidegabekeria” iruditzen zaie bere atxiloketa. “Bizarra Lepoanen uste dugu gatazkaren konponbidea soilik etorriko dela bide demokratikoetatik, elkarrizketaren eta Euskal Herriaren aitortzaren bidetik”, gaineratu dute. “Berriro ere gurean laster izatea” opa eta “besarkadarik beroena” bidali dio berangoztarrari Bizarra Lepoanek. Argazkian, igandean dozenaka lagunek salatu zuten Jagoba Terronesen espetxeratzea Berangon.

Bizarra Lepoan, Getxoko euskara elkartearen oharra:

Jagoba Terrones Bizarra Lepoaneko lankidea eta laguna atxilotu eta espetxeratu dute. Zuetako askok aukera izan duzue berarekin egoteko toponimia-ibilbideetan. Bizarra Lepoaneko batzordeko kideok atxiloketa hau salatu nahi dugu eta Jagobari, bere familiari zein lagunei elkartasuna adierazi nahi diegu.

Jagobak lan politikoa eta publikoa egiten du. Horrexegatik, bidegabekeria iruditzen zaigu bere atxiloketa. Bizarra Lepoanen uste dugu gatazkaren konponbidea soilik etorriko dela bide demokratikoetatik, elkarrizketaren eta Euskal Herriaren aitortzaren bidetik.

Espero dugu Jagoba laster izatea berriro ere gurean. Hemendik besarkadarik beroena bidali nahi diogu.

zabaldu | bildu

ukberri.net

Leioako Betiko ikastolako LAB sindikatuak bere elkartasuna adierazi dio Jagoba Terrones Berangoko preso politikoari, gaur “Berria” egunkariak jakinarazi duenez. Terronesek ikastolako jantokian egiten zuen lan, pasa den ostiralean Espainiako Poliziak Algortako bere etxean atxilotu arte. Berangoztarrari zortzi urteko espetxe zigorra ezarri zion Auzitegi Nazionalak Askatasuna eta AABen aurkako 33/01 auziko epaian eta Espainiako Auzitegi Gorenak zigorra berretsi zuen ostiralean bertan. Egun, azken albisteen arabera, Terrones Basauriko espetxean jarraitzen du, eta larunbatean eta igandean senideen bisitak jasotzeko aukera izan zuen. Bestalde, atxiloketaren ostean Indautxuko komisariara eraman eta bertan polizia batek psikologikoki estutzen ibili izana salatu zuen AAMk igandean Terronesen aldeko martxa bat abiatu aurretik. Era berean, Ertzaintzak Terronesi elkartasuna adierazteko bere etxe inguruan bildutakoei agertutako “jarrera harroputza” nabarmendu zuten. Argazkian, atxiloketa unean izandako agur besarkadak.

zabaldu | bildu

ukberri.net

Euskal presoak Euskal Herriko lantokietara ekartzea aldarrikatuko du ostiralean LABek

“Euskal presoak Euskal Herrira! Euskal presoak lantokietara!” lelopean elkarretaratzea deitu du ostiral honetarako Eskumaldeko LABek. Hitzordua Algortako Telletxe kaleko oinezkoentzako gunean jarri dute sindikatuko kideek, goizeko 12:30ean. Txorierri, Mungialdea eta Uribe Kosta hartzen duen Eskumaldeko LAB sindikatuak hilabetean behin egiten du kontzentrazioa Ipar Uribe eskualde handian, beti lehenengo ostiralean eta herriz herriz txandakatuz. Argazkian, LAB sindikatuak pasa den urriaren 3an Algortako Telletxe kalean egindako kontzentrazioa.

zabaldu | bildu

ukberri.net

> Algorta, Durango eta Galdakaoko mobilizazioak GazteSarean: hemen

“Gazte eta aske, irabazi arte!” irakur zitekeen pankartaren atzean, Uribe Kosta eta Erandioko 200 lagun baino gehiago manifestatu da, gaur eguerdian, Algortan, Espainiako Auzitegi Nazionalean 16 bizkaitarri egin dieten epaiketa salatzeko. Martxa kaleetan barrena joan ahala ugariak izan dira euskal gazteriaren aldeko eta EAJ eta Ertzaintzaren kontrako oihuak. Azken horiek, baina, manifestazioa batzokiaren aurretik (argazkian) igaro denean areagotu egin dira: “Zipaioek ere torturatzen dute” eta “EAJ torturatzaile” bota dizkiete bertan bildutakoei. Izan ere, epaitutako gazteak 2002an atxilotu zituztenean, Arkauten jasandako “torturen erantzuletzat” jo dute alderdi jeltzalea manifestariek. Herenegun eta atzo epailearen aurrean aurkeztu behar izan ziren Urtzi Paul eta Kepa Saratxaga ere egon dira manifestazioan.

2002ko atxiloketak ez ezik, orain hiru hilabete pasatxo Uribe Kostan eta aste honetan Lea-Artibain izandako polizia operazioak ere “gazteonganako errepresio basatiaren” adierazletzat jo dituzte, manifestazioa bukatuta irakurritako oharrean. Egun Aner Mimenza, Lander Labajo, Mikel De Gregorio, Gorka Oribe, Joseba Elorriaga eta Juan Bautista Galdiz “Batxi” algortarrek jarraitzen dute kartzelan eskualdean izandako sarekadaren ondorioz. Asteazkenean, berriz, Oliba Gorriak musika taldeko Iban Etxebarria “Ezkerra” eta Eneko Ostolaza atxilotu zituzten beste 6 gazteekin batera. “Oraingoan, polizia nazionalak izan dira txakurrak. Baina berdin dio, Guardia Zibila, Polizia Nazionala edo Ertzaintza. Denek dituzte helburu berberak”, ohartarazi dutenez. Hartara, PSOE eta “haren laguntzaile” EAJ egin dituzte “independentziaren aukera suntsitzea” helburu duen “errepresio basati honen erantzule”.

Manifestazio bukaeran irakurri duten idatzia:

Alde bateko eta besteko biktimez hitz egiten digute, beraiek neutralak balira bezala. Baina hemen herritarrak gara biktima bakarrak, sistema neoliberal hiltzailearen biktimak.

Gure aitona-amonei frankismoa odolean sufritzea tokatu zitzaien, eta hamarkada batzuk beranduago, beren bilobok Frantzia eta Espainia kapitalisten inperialismoa pairatzera kondenatuta gaude. Baina iraganean bezala orain ere, gazteok biktima hutsak izatetik haratago borrokalariak izatea erabaki dugu. Belaunaldiz belaunaldi, eskuz esku igaro da borrokaren lekukoa, orain geuk daukagu, geure eskuetan dago.

2002ko azaroan 17 gazte bizkaitar atxilotuak izan ziren operazio bakar batean. PNVren polizia autonomiko espainolak atxilotu eta bortizki torturatu zituzten. Orain, 5 urte beranduago, torturapean egindako deklarazioetan oinarrituz epaitu egin dituzte. Gaur egun ere ehunaka dira errepresioa pairatzen duten gazteak: jarraipenak, mehatxuak, kartzelaratzeak, baita torturak ere, Igor Portu bezala ospitalean bukatzeraino edo kasu gehienetan norberak baino jakin eta sufritu ez dituenak.

Errepresio basati horren adierazgarriak dira herri honetan, Algortan, orain dela 4 hilabete inguru eman ziren 9 gazteen atxiloketak. Oraindik ere horietatik 6k kartzelan jarraitzen dutela. Oraingoan, polizia nazionalak izan dira txakurrak. Baina berdin dio, Guardia Zibila, Polizia Nazionala edo Ertzaintza. Denek dituzte helburu berberak.

Errepresioaren uholdea etengabea da. Izan ere, aste honetan ere Polizia Nazionalak Markinako 8 gazte atxilotu ditu, independentzia eta sozialismoaren aldeko zortzi borrokalari.

PSOE eta haren laguntzaile PNV dira errepresio basati honen erantzuleak. Errepresioa erabiltzen dute euren asmo alderdikoi eta elektoralistak erdiesteko, helburu zehatz batekin: independentziaren aukera suntsitzea.

Zalantzarik gabe, beren helburu kapitalistak bete asmoz, borrokalari guztiak paretik kentzeko apustua egin dute. Gazteok errepresioaz mehatxatu gaituzte, beren interesak oztopatzen ditugun heinean zapalduko gaituztela adierazi digute. Baina guk oso argi daukagu: Euskal Herria eta euskal herritarrak defendatzera goaz, herri honetan ez dute nahi dutena egiterik izango. Eta gazteoi egurra ematera badatoz, aurrean izango gaituzte. Belaunaldi ezberdinak torturatu eta kartzelaratuko dituzue, baina independentziaren alde borrokatzeko prest egongo den belaunaldi berri batekin topatuko zarete, duela 5 urte balio ez zuena, gaur egun ere ez, errepresioarekin ez dago euskal gazteriarekin bukatzerik, Uribe kostan, Burlatan, Donostian edota Markinan belaunaldi berriekin topatuko zaretelako. Bidea argi daukagulako Jo Ta Ke independentzia eta sozialismoa lortu arte.

Gazte eta aske irabazi arte!

zabaldu | bildu

ukberri.net

Arratsaldeko 8etan Algortako Telletxe plazatik abiatutako manifestazioa (argazkian) bukatu eta berehala jakin berri du, Uribe Kostako Amnistiaren Aldeko Mugimenduak, Baltasar Garzon epaileak Joseba Elorriaga “Peski”, Mikel de Gregorio “Degre”, Txomin Gezuraga, Lander Labajo, Aner Mimenza eta Josu Rodriguez “Nekora” baldintzarik gabe espetxeratzea erabaki duela; eta horrela jakinarazi die bertan bildutako 900 bat lagunei. Zigor Goikoetxea “Gorrion”, berriz, ospitalera eraman dute, 6.000 euroko fidantzapeko askatasuna ezarri ostean: “kimioterapia ematen ari zaizkio eta larria da bere osasun egoera. Hala ere, egurtu egin dute”, salatu du errepresioaren aurkako erakundeak. Gainontzeko seiak ere “torturatuak” izan direla baieztatu du AAMk, senide eta lagunek emandako informazioan oinarrituta.

Horietako batek Labajoren berri eman du manifestazioa hasi baino lehen, “asko egurtu” dutela adieraziz: “Guztiak berotu dituzte, baina batez ere Landerrek hartu du jipoirik handiena. Psikologikoki oso indartsu daude, baina dena muntaia dela badakiten arren, argi daukate barrura sartuko dituztela”, gaineratu du oraindik ere epailearen azken erabakiaren berri ez zekiela. Rodriguez inkomunikaziopean eta konfidantzazko abokatua bertan ez zegoela deklaratu behar izan badu ere, gero gurasoekin hitzegiteko aukera izan duela jakinarazi du AAMk. Goikoetxearen fidantza ordaintzeko, berriz, diruz laguntzera deitu dituzte bertan bildutakoak. Bost eguneko epea dute horretarako. Horrekin batera, datorren astean zehar, asanblada bat egiteko asmoa adierazi du errepresioaren aurkako erakundeak, “operazio honen inguruan informazioa eman dezaketen guztien parte hartzearekin; senide, lagun, abokatu eta medikuak, besteak beste”. “Atxiloketa horien atzean zer ote dagoen desestaltzea” da AAMren helburua.

Harrapatze saiakerak

Giroa bero zegoen arren, ez da gorabehera nabarmenik izan manifestazioa Telletxe plazatik abiatu eta Telletxe eta Algortako etorbidearen arteko bidegurutzean amaitu bitartean. Neska-mutilak ziren bildutako gehienak eta “torturaren” eta “gazteriaren kriminalizazioaren” aurkako oihuak entzun dira nagusiki. Batzokiaren aurretik igarotzean, berriz, EAJren aurkako aldarriak egin dituzte elkartutakoek. Alabaina, “Eusko Gudariak” abestuta protesta bukatu eta berehala, une oro manifestazio atzetik joan diren Ertzaintzaren Brigada Higikorreko bi furgoiak errepide kantoietan zeuden herritarrak zapaltzen ahalegindu dira, abiadura bizian eta ateak zabalduz. Behin baino gehiagotan egin dute gainera, lehendabizi Amnistia taberna bidean joan eta, ondoren, errepidean gora eginez. Polizia autonomikoaren aurkako oihu zaparradaren artean joan dira, azkenik.

zabaldu | bildu

Batasunako mahai nazionalaren atxiloketak urrats berri bat suposatzen du azken asteotan salatu dugun estrategia errepresibo berriaren baitan. Mahai nazionala espetxeratu izanak gobernuak egin duen apostu errepresiboaren tamaina erakusten digu. Baina urte hauetan guzietan argi gelditu da errepresioa antzua izan dela independentziaren aurkako borroka gelditzeko bide bezala. Beraz, bide hau alboratu eta gatazkaren erroetara jotzeko deia luzatzen diegu espainiar eta frantziar gobernuei.

Gogoratu nahi dugu azken bi asteotan 40 atxilotu baino gehiago izan direla Euskal Herriaren luze zabalean, polizia frantziar eta espainiarrak eskuz esku burutuak.

Azken atxiloketak PSOE-ko gobernuaren eskutik etorri zaizkigun arren, ezin dugu ahaztu Segurako polizia operazioa Balzak zuzentzen duen Ertzaintzaren kolaborazioz burutu zela. Kasu honetan Batasunako mahai nazionalaren atxiloketa, inkomunikazioa, espetxeratzea eta sakabanaketari bidea erraztuz. Ibarretxe jauna, zer egin behar duzu gertaera latz hauen aurrean? Legearen aitzakian ezkutatu beste behin? Zein da zuk independentziaren aldeko hautua egiten duten herritarrei etengabe erasotuak diren honetan eskaintzen diezun babesa?

Aro errepresibo bortitza dugu aurrez aurre, eta herri eta auzoetan errepresioaren aurkako borroka antolattu behar dugu eremuz eremu. Atxilotuen askatasuna eskatzen dugu eta dei egiten dugu datozen egunetan burutuko diren mobilizazioetan parte hartzera.

zabaldu | bildu