berria.info

Amaia Izko eta Ainhoa Baglieto AAMren kontrako epaiketako abokatuak

Amnistiaren Aldeko Mugimenduko auzipetuak zigortzeko frogarik ez dagoen arren, zigorra espero dute abokatuek. Zigorra mugimendu osoarentzat izango dela ohartarazi dute.

«Epaiketari jantzi juridikoa eman zaio, baina ez du ezer juridikotik»

Amnistiaren Aldeko Mugimenduko (AAM) 27 lagunen kontrako auziko epaia «politikoki komeni denean» jakinaraziko du Espainiako Auzitegi Nazionaleko epaimahaiak, Amaia Izko eta Ainhoa Baglieto abokatuen iritzian. Nolanahi ere, ez dute dudarik, zigorra espero dute.

Zer epai espero duzue, eta noizko?

AMAIA IZKO. Noizko ez dago jakiterik. Interesatzen zaienean aterako dute. Epaiketa hasi baino lehenago eta amaitu baino lehenago esan genuen zigorra espero genuela, eta bukatu ondoren, gauza bera berretsi behar dugu. Ez bakarrik auzitegiak inolako bermerik ez duelako ematen, edo kasu gehienetan auzitegiak zigorra jartzen duelako, baizik eta, auzitegiak etsaitzat dituelako epaitu dituenak. AAMtik beti salatu da auzitegiaren papera. Orain, auzitegi horrek pertsona horiek epaituta, zer espero behar dugu? Zigorra. AAMrentzat zigorra. Aldarrikapen horrentzat zigorra. Hala ere, gerta daiteke auzipeturen bat libratzea, normaltasunaren irudia eman nahi dutelako.

AINHOA BAGLIETO : Ohituta gaude Auzitegi Nazionalean berme gutxi egotearekin, eta horretaz gain, kasu honetan aurrekariak ditugu, Garzonen teoria hori, jada, epaiketara eraman izan delako. Hor daude Haika-Segiren eta 18/98ren aurrekariak.

AAM zigortuko dutela esaten duzue. Zein jokaleku geratuko zaio mugimendu horri?

IZKO: Daukana. Zailagoa izango da aldarrikapena aurrera eramatea, baina aurrera eraman behar da, arrazoi gehiagorekin. Une honetan Segirekin gertatzen dena gertatuko da, alegia, edozein lagun atxilotu dezaketela, kartzelatu eta epaitu, Segikoa izatea ETAko kidea izatea dela ulertzen delako. Baina errepresio mota horri ere aurre egin beharko zaio. Ez da inoiz erraza izan amnistiaren aldeko aldarrikapena aurrera eramatea. 70.eta 80. hamarkadetan amnistia aldarrikatzeagatik jendea hiltzen zuten kalean. Honek zailduko du salaketa egitea, baina ez dut inolako zalantzarik aurrera jarraituko dugula. Jokaleku eskasa geratuko zaie, baina beti eduki du jokaleku eskasa estatuaren defizit guztien salaketak.

BAGLIETO: Ez da pertsona batzuen kontrako epaiketa izan. Mugimendu baten kontrakoa izan da, eta hori, bide penalean ezin da egin. Baina, beraien helburua mugimendu baten kontra doa.

27 lagun eraman dituzte auzitegira, baina, pertsona horiek zigortzeko moduko ezer egin dutenik ez da frogatu. Frogatu dute AAMko kide direla, eta hori akusatuek beraiek aitortu zuten aurrenengo egunean.

IZKO : Urteetan aritu dira publikoki AAMren izenean. Ez dute inoiz ezkutatu beren ekimena. Alderantziz, esan, onartu eta aldarrikatu egin dute. Epaiketa osoa pasatu dugu frogatuta zegoen gauza bat frogatzen. Baina AAMko kide izatea, ezin da delitua kontsideratu. Zigortzeko bigarren pauso bat eman behar da, eta pertsona horiek ETArekin lotu. Horretan ez dute frogarik aurkeztu. Polizia bat joan da, eta esan du berak badakiela hauek Ekinekoak direla eta beraz ETAkoak direla. Eta kito. Ez da besterik egin.

BAGLIETO: Eta ez hori bakarrik. Ekinen bitartez aldarrikapen sozial eta politikoak aurrera eramatea egozten die, hau da, Euskal Presoak Euskal Herrira, Alde Hemendik eta horrelako hainbat ekimen aurrera eramatea. Ez delitua suposatzen duen ekimen politikoa, baizik eta ekimen politiko- soziala. Azken batean, ekimen politikoengatik epaitu dituzte.

IZKO: Horri guztiari kutsu kriminal bat eman nahi izan zaio, modu erabat artifizialean ETArekin lotu nahian, baina pauso hori ez dute inondik inora eman.

Frogarik ez dagoela diozue, baina zigorra espero duzue. Zergatik?

BAGLIETO: Estatuari ez zaiolako interesatzen horrelako mugimendu bat egoterik. ETAk hainbat mugimenduk eduki dezaketen ideologia berdina duelako hor kokatu dute delitua. Bat etortze ideologiko bat zigortu dute. Estatuaren oinarri demokratikoak zalantzan jartzen dituen mugimendurik ez egotea da helburua. Ez dute estatuaren demokrazia falta kritikatzen duen masa mugimendurik nahi.

Baina, hori juridikoki argudiatu beharko dute, ez?

IZKO: Horregatik eraman zuten froga periziala. Hemen dena konpontzen da froga perizial batekin. Polizia bat etorri zen esatera: ‘Ni froga naiz -informe polizial bat froga perizial bihurtzen dute- eta esaten dut pertsona hauek Ekinekoak eta Gestoretakoak direla, eta Gestoretako arduradun izateko ETAren konfiantza osokoak izan behar dute’. KASekoak izandakoak edo Ekinekoak direla gaineratzen du. Guzti hori esaten du ezertan oinarritu gabe, baina froga da! Auziaren gakoa berak esaten duena da. Jantzi juridikoa ematen zaio honi guztiari, baina juridikotik ez dauka ezer. Gisa honetako epaiketak egiteko beharrezkoa da erabaki politikoari janzkera juridikoa emateko prest dagoen auzitegi bat, eta hori Auzitegi Nazionala da.

BAGLIETO : Gainera, lotuta dituzte ondorengo auzitegiak ere. Gorena, Konstituzionala…

Hori guztia kontuan hartuta erabaki zuten auzipetuek defentsari uko egitea?

IZKO. Edozein pertsona Auzitegi Nazionalera badoa, badaki aukera asko dituela zigortzeko. Bistan dago, defentsa juridikorako oso margen txikia dagoela, Auzitegi Nazionala errepresiorako instrumentu bat da. AAMko kideek goitik behera kuestionatzen dute Auzitegi Nazionala. ‘Ez zaitut onartzen, salatzen zaitut egunero suposatzen duzunarengatik, eta horregatik epaitu behar nauzunean ez naiz zure aurrean defendatuko. Zertarako defendatuko naiz? Nik salatu egiten zaitut’. Eta hori egiten saiatu dira. Defentsarako inongo margenik ez dagoela salatzen, eta Auzitegi Nazionalaren goitik beherako kuestionamendua egiten.

BAGLIETO : Beraiek oso argi zeukaten 1998an inpultso politiko baten ondorioz abiatutako auzi hauek mugimenduak zigortzera doazela, eta plus bat bazegoen AAMrekin, lehenengo lerroko etsaiak izanda.

Hala ere, auzitegian bertan egon ziren auzipetuak deituta zeuden bakoitzean.

IZKO: Bai, eta jende askok galdetu digu guri eta baita auzipetuei ere nolatan edo zertarako joan diren. Eta hauek oso argi esaten zuten, beraiek joan direla berriz ere salaketa politikoa egitera, eta epaimahaiaren aurrean errepresioaren argazkia erakustera. Beraiek ez direla AAMko partaideak egun batean ez dakit nola esnatu zirelako, baizik eta errepresio horri aurre egin beharko zaiolako.

Auzitegia deseroso sentiaraztea lortu zuten. Lekukoekin izan zuen jarrera ez al da horren adibide bat?

BAGLIETO: Auzitegiak aurretik bazituen bi esperientzia, Haikakoa eta 18/98koa, eta epaiketa honetara jarrera itxuraz demokratiko bat erakutsi nahian etorri dira. Inkisizioaren paper hori ez zuten azaldu nahi, eta aurrenengo momentuan nabaritu zen. Baina lekukoak estatuaren eta auzitegien papera salatzen hasi zirenean, eta batez ere torturaz hitz egiten hasten zirenean, ezin izan zuten itxura mantendu.

IZKO: Gainera, fiskalak eta auzitegiak azaldu behar izan zuten, epaiketa ez zela politikoa, eta delituak epaitzen ari zirela, ez zegoela ezer idatzita… Horregatik, auzipetuek baloratzen dute lortu zutela zerbait.

Fiskalak eta AVTk epaiketan izan zuten jarrera zer iruditu zitzaizuen? Galdera berberak egin zizkieten guztiei.

IZKO: Ezin zuten pertsonalizatu akusazioa. Teoria bat aplikatu behar zitzaien, eta teoria bat mundu guztiarentzat daukazunean zer galdetu behar duzu? Gauza orokorrak. Ez zeukaten besterik. Oso agerian geratu zen, inorentzako ez zegoen akusazio zehatzik.

BAGLIETO: Eta frogen inguruan ere beste hainbeste. Funts bakarra informe periziala zen. Auzi honetan, pertsona hauen tortura salaketarik ez zegoenez autoinkulpaziorik ere ez zeukaten. Beste kasu batzuetan torturapean ateratako deklarazioak hartzen dituzte oinarri gisa, baina kasu honetan, hori ez zutenez, informe perizial batekin azaldu behar izan dute.

Epaiketan zehar defentsarik egin ez zenuten arren, azken ondorioak azaldu egin zenituzten. Zergatik?

IZKO: Informeekin saiatu ginen auzipetuek zeukaten asmoa gauzatzen. Sartu ginen erabilitako frogekin, baina ez juridikoki deuseztatzeko, baizik eta adierazteko, estatuan dagoen defizit demokratiko hori islatu egin dela epaiketan. Estatuan poliziak markatzen dituela irizpide guztiak, eta epaiketan berdin gertatu dela. Inportantea zen mahai gainean jartzea zein froga eskasa zegoen. Zentzu horretan hitz egiten zen kriminalizazioaz. Frogarik ez badago, zergatik gaude epaiketa honetan? Ez bada frogatu prozedura osoan zehar eta ezta epaiketan ere jende honek delituak egin dituenik, zergatik gaude hemen? Beraiek egin duten eta onartu duten jarduera kriminalizatu egiten delako. Saiatu ginen azaltzen zergatik geunden han, zergatik sortu zen AAM eta zergatik estatuak ezin izango duen inoiz onartu honelako mugimendu bat egoterik.

Haika-Segiren eta 18/98ren ondorioa dela epaiketa hau esan izan duzue askotan. Zergatik?

IZKO: 18/98ko epaian bertan agertzen da AAM ETAren fronte bat dela. Txema Matanzas horregatik dago zigortuta.

BAGLIETO : Eta ez hori bakarrik, jada, AAMren inguruko balorazio bat egin zen epaiketa horretako frogetan, eta hori legez ere ezin da egin. Mugimendu hori gero epaitu behar baduzu, aldez aurretik epaitzen duzulako.

IZKO: Horregatik esaten genuen buruz beherakoa egin ahal genuela epaiketan, baina jadanik erabakita zegoela zigorra.

BAGLIETO: 1998an Garzonen teoriarekin horrelako atxiloketak aurrera eramaten hasi zirenean, Auzitegi Nazionaleko 4. sekzioak ez zituen teoriak ontzat hartu, eta epaitegi horretako magistratuak desagerrarazi egin zituzten. Beraz, garbi zegoen ibilbide bat markatua zegoela, eta zein izango zen horren ondorioa. Teoria horren enborra Haika-Segiren epaiketatik zehaztua zegoen. Baita ere erakunde armatuaren kide izan zitezkeela armekin inolako harremanik eduki gabe, erakunde militarraren kideekin harremanik izan gabe, eta kode penalean ezartzen diren delituak egin gabe.

«Enbor» hori kontuan hartuta, pentsa dezakegu etorriko diren epaiketetan gauza bera gertatuko dela?

IZKO: Fiskalak aurreratu zuen zigorra etorriko zela epaiketa honetan eta datozenetan. Behin teoria politiko-polizialak gorputza hartzen duenean… Teoria horrek esaten du ETA fronte desberdinekin dagoela osatuta, eta jadanik fronte horietako bi epaitu eta kondenatu dituzte, hirugarrena epaitu eta seguru asko kondenatu, eta gainontzeko guztiak berdin joango dira. Poztuko ginateke horrela ez balitz, baina…

BAGLIETO: Oinarri berdin-berdinak dituzte Udalbiltza, Batasuna eta dauden auzi guztiekin: informe periziala. Teoria berdin-berdina mantenduko dute: ‘ETAk esana, hainbat mugimenduk egina’. Eta horretarako, pertsona guzti hauek arduradun izan dira, eta hauek Ekinekoak dira, edo bere garaian KASekoak. Hori da oinarria, eta printzipioz, eta ez badute beste itxura bat eman nahi…

Soka horrek badu amaierarik?

BAGLIETO: Herriaren mugimendua.

IZKO: Soka hori politikoki garaitu behar da, ez dago besterik. Argi dagoena da, juridikoki ez dagoela borrokatzerik eta irabazterik. Jendea horren aurrean asaldatzen denean bakarrik amaituko da. Hori noiz gertatuko den? Ez dakit, baina seguru nago gertatuko dela.

Amaia Izko

«Oso agerian geratu da ez dagoela akusazio jakinik auzipetutako inorentzako»

«Fiskalak aurreratu zuen zigorra etorriko zela auzi honetan eta datozenetan»

Ainhoa Baglieto

«Ez da pertsonen kontrako auzia izan, mugimendu baten kontrakoa baizik»

«Ekimen politiko soziala egiteagatik epaitu dituzte, ez beste ezerengatik»

Euskal herriak Askatasuna behar du! lemapean burutu da manifestazioa. Errepresioari duintasunez aurre egiteko deia luzatu dute.

2000 lagun inguru bildu dira gaur Iruñean 33/01 AAMren aurkako epaiketa ixiltasunean salatzeko. Manifestazioa nafarroako preso politikoen argazkiek ireki dute, horien atzetik sei pankarta ezberdin joan dira aldarrikapen desberdinekin.

Manifestalidaren amaierako ekitaldian Iosu Beaumont inputatuak hartu du hitza, AAMk egiten duen lanaren garrantzia azpimarratuz. Errepresio estrategiak porrot egin duela aldarrikatu du, errepresioari duinatsunez aurre egin zaiolako. Etorkizunean horrela izaten jarraituko duelaren segurtasuna erakutsi du.

> gara.net: La denuncia del juicio contra el movimiento pro amnistía llega a Sevilla
> gara.net: Silencio en Iruñea para denunciar la represión
> berria.info: Beaumont: «Ez gara isilduko»
> gara.net: Antonio Alvarez-Solís: La dignidad de la toga

Prentsaurrea eskaini dute epaiketan eman duenaren balorazio politikoa egiteko. Beraiek helburuak betetzat eman dituzte eta asteburu honetako mobilizazioetan parte hartzeko deia zabaldu dute.

> gara.net: El movimiento pro amnistía es necesario para hacer frente a los abusos policiales // Satisfechos tras sacar a la luz la realidad represiva de Euskal Herria
> berria.info: “Gutxieneko demokratikoak lortu arte” lanean segituko duela dio Amnistiaren Aldeko Mugimenduak // Epaiketarako zehaztu zituzten «helburuak bete» dituztela diote AAMko auzipetuek

Gaurko saioaren hasieran defentsako abokatuek beraien informea aurkeztu dute, bertan epaiketan eraman duen bideari kritika zorrotza egin zaiolarik eta inolako frogarik aurkeztu ez den epaiketa politikoa izan dela salatuz.

Ondoren Julen Larrinaga, Maite Diaz de Heredia, Sabin Juaristi eta Juan Antonio Madariagak hartu dute hitza eta lehen egunean esandakoak berretsi dituzte. Are gehiago auzia nola joan den ikusita. Berauen esanetan dokumentalek ageria utzi dute Amnistiaren Aldeko Mugimenduaren lana zein izan den urte hauetan zehar.

Madariagak sufrimenduaren inguruan hitz egin du eta argi utzi nahi izan du sufrimenduaren monopolioa ez duela estatuak. Hemen gatazka bat dagoela edierazi du, eta gatazka horretan dauden alde guztiek sufritzen dutela. Bere esanetan kontua ez da gehiago nork sufritzen duen neurtzea, sufrimenduarekin amaitzeko borondatea nork duen baino.

Auziperatuek azpimarratu dute jokoan ez dagoela 27 auziperatuen etorkizuna bakarrik, Amnistiaren Aldeko Mugimendua baita finean zigortu nahi dutena. Hala ere, argi esan nahi izan dute Amnistiaren Aldeko Mugimenduak lanean jarraituko duela herri honetara minimo demokratikoak ekarri arte. Euskal Herriaren hitza eta erabakia lortu eta Amnistiaren bidean lanean jarraituko duela alegia.

Asteleheneko saioan:

Atzoko saioan Askatasunaren eta Amnistiaren Aldeko Batzordeen aurkako kriminalizazio argia ikusi ahal izan genuen. ETA-ren eskeman lan egitea egotzi zitzaien:

Helburuak seinalatzea, kolektiboaren kontrola, kaptazioa, ihesean daudenak laguntzea, kale borrokari dagozkion gaiak koordinatzea e.a.

Banakako akusazio zehatzik ez dago, denei antzekoa egozten zaie: Ekineko kide izatea, ezker abertzaleko bilkuretan parte hartzea, helburuak seinalatzea e.a. Gaur AVT-k bere akusazioak egin ditu, bertan zeudenek adierazi dutenaren arabera akusazio benetan lotsagarri baten bidez.

Askatasuna eta Amnistiaren Aldeko Batzordeen ilegalizazioa eskatzen dute. Askatasunaren sorrerak ere ETA-ren irizpideei jarraitzen ziela adierazi dute, erakunde nazionalak sortzeari begira e.a.

Askatasunaren irakurketa:

Gogor salatu nahi dugu elkartasuna eta kritika politikoa zigortzeko saiakera berri hau. Amnistiaren Aldeko Mugimendua testigu deserosoa da estatuarentzat eta hori da aurretik kendu nahi dutena.

Baina bai epaiketan, bai kalean argi gelditu da errepresioak ez duela errepresioaren salaketa geldituko. Herri honetan jazartua denak beti izango du elkartasuna eta babesa. Gatazka politikoak ez dira espetxeekin konpontzen, pasa den astean Irlandarrek ondo azaldu zuten bezala. Zentzu honetan azken preso edo iheslari politikoa etxean eta eskubide guztien jabe izan arte lanean jarraituko dugula adierazten dugu.

> berria.info: AAM: «Traba egiterik nahi ez baduzue, utz iezaiozue eskubideak urratzeari»
> gara.net: La defensa denuncia «la pobreza» de las pruebas contra los imputados

Fiskalaren ostean, gaur AVTko abokatuak berretsi egin du haren eskaria gaurko saioan.

> berria.info: AVT: «Preso eta senideei laguntzen dien GKE bat baino zerbait gehiago da AAM»
> gara-net: ¿Cómo van a defenderse ante una locura que no tiene ninguna lógica?

Julen Zelarain, Aitor Jugo eta Juan Mari Olanori 13 urtera igo diote espetxe zigor eskaera.

Bestalde Mitxel Sarasketa, Jorge Arredondo eta Maitane Mendez absolbatzeko eskera egin du beraien aurkako frogarik ez dagoelako.

Aste honetan dokumentazioarekin amaituko dute eta behin eskera fiskalak berkalfikatu ondoren fiskalak, akusazio partikularrak eta defentsak beraien azken ondorioak aurkeztuko dituzte.

Honez gain akusatuek ere azken hitzak egiteko aukera izango dute.

> gara.net: El fiscal retira los cargos a tres procesados y eleva la petición para Olano, Zelarain y Jugo
> berria.info: Olano, Zelarain eta Jugorentzat zigor eskaera hiru urte handitu du Fiskaltzak

>> apurtu.org: 33/01: “ESTA ES LA FOTO DE LA REPRESIÓN Y DE LA VIOLENCIA DEL ESTADO EN NAFARROA”

berria.info

Ipar Irlandan presoak kalera ateratzea negoziazio politikoaren ondorio logikoa izan zela esan dute

Michael Coulbert eta Sean Lynch preso ohi irlandarrek Amnistiaren Aldeko Mugimendua (AAM) «kriminalizatzeko» ahalegina baztertu egin behar dela adierazi dute, «aurrena elkarrizketara eta, ondoren, negoziazio politikora» igarotzeko, «Irlandan gertatu bezala».

Espainiako Auzitegi Nazionalean epaitzen ari diren AAMren kideei elkartasuna adieraztera eta auzi horren berri izatera etorri dira preso ohi irlandarrak Euskal Herrira, Julen Arzuaga abokatuak argitu duenez. Epaiketa horretan «kriminalizatu» egin nahi dituzte «Estatuaren bortxakeria salatzeko, errepresaliatu eta preso politikoei elkartasuna adierazteko eta konponbiderako proposamenak egiteko» lanak, Arzuagaren esanetan. AAMk egiten duena hori dela eta Espainiako Auzitegi Nazionalak epaitu nahi duena lan hori dela esan du abokatuak.

AAMren aurkako epaiketari buruz ezagutu ahal izan dutena Ipar Irlandan ere jazo zela esan du Michael Coulbertek. «Mugimendu errepublikar osoa kriminalizatzen» saiatu ziren agintari britainiarrak, baina gero «aldatu egin behar izan zuten euren jarrera», Coulberten arabera. «Elkarrizketa eszenatoki batera pasa behar izan zuten aurrena, eta gero politikoki negoziatzera», esan du.

Coulbert IRAko preso ohiekin lan egiten duen Coiste elkarteko zuzendaria da egun eta argi du «preso politiko ohien parte hartze aktiborik gabe ezinezkoa izango zela» gaur egun Ipar Irlandan bizi den egoerara iristea.

Sean Lynch IRAko preso ohiak nabarmendu du bake prozesuak aurrera egin zuela «gatazkak hunkitzen zituen eragile eta subjektu guzti-guztiak» kontuan hartu zirelako eta gatazkaren gaineko «arazo guztiez hitz egin zelako».

Ipar Irlandan presoak kartzelatik ateratzeko erabakiak oposizio handia izan zuela esan du Lynchek, baina «negoziazioaren baitan etorri zen ondorio logikoa» izan zela uste du. Amnistiak edo presoak kartzelatik ateratzeak gatazkak konpontzeko hartu behar diren neurrien artean dutela zentzua adierazi du preso ohiak eta Ipar Irlandako esperientziak Euskal Herrirako balio lezakeela iritzi dio. Gakoak «elkarrizketa, komunikazioa eta negoziazioa» direla nabarmendu du.

>> gara.net: Reivindican el estatus político de los presos en la resolución de conflictos

La Razon egunkariak gaurko alean argitaratu duenez, 33/01 epaiketan fiskalak 13 urteko espetxe zigorra eskatuko ditu Joan Maria Olano, Julen Zelarain eta Aitor Jugorentzat, Amnistiaren Aldeko Batzordeen arduradunak izanik ETAko buruzagiak izatea egotzita.

La Razonen arabera fiskalak beste hiru auzipetuen akusazioa kenduko du eta, horren arabera, Mitxel Sarasketa (Getxo), Maitane Mendez (Durango) eta Jorge Luis Redondo (Bilbo) libre geldituko lirateke, egindako akusazioak frogatzerik egon ez delako.

Gainerako beste 22 auzipetuentzat, La Razonek dioenez, fiskalak ez du behin-behineko eskaera aldatuko, hau da, 10 urteko espetxe zigorra eskatuko die Amnistiaren Aldeko Batzordeko kideak izanik ETAko kide izatea egotzita.

Epaiketa datorren astean amaitzea espero da, ekainaren 16, 17, 18ko saioetan edo. Ekainaren 16an itzultzeko falta diren dokumentalak irakurri eta horren ostean fiskalak eta AVTko abokatuek beren eskaerak egingo dituzte. Auzipetuen abokatuen txanda etorriko da ondoren eta auzipetuen hitzarekin amaituko da epaiketa hau, esandako egun horietan, hartzen duen denboraren arabera.

>> La Razon-en artikulua: hemen
>> El correo: La Fiscalía pedirá la condena máxima para los dos líderes de Gestoras

Atzo Madrilen eman zuten hitzaldian espainiar estatuan ematen diren eskubide urraketa handien inguruan aritu ziren. Julen Arzuaga auziperatua izan zen bertan besteak beste.
AMNISTIAREN ALDEKO BATZORDEEN ETA ASKATASUNAREN AURKAKO EPAIKETA ENTZUTEGI NAZIONALEAN

Behean sinatzen dugun erakundeok Espainiar Estatuan torturatu egiten dela salatu izan dugu beti. Egoera ez da aldatu. Era berean, ikusi dugu espainiar espetxe sistemak, presoak birgizarteratzeko omen duen helburua bete beharrean, preso dauden pertsonak suntsitzea duela helburu, batez ere preso egoteko arrazoia aldarrikapen politikoak edo sozialak egitea izan denean.

Gainera, ikusi dugu estatuak ez duela inolako arazo moralik izan bere esku dauden tresna guztiak (legezkoak edo ez) erabiltzeko arazo sozial eta politikoei klabe errepresibo hutsean aurre egiteko orduan, bereziki “euskal arazoa” deitzen diotenari.

Oso kezkatuta ikusten ari gara lan politiko eta soziala kriminalizatzeko estrategia. Estrategia honen baitan, alderdi politikoen eta elkarteen jarduna bertan behera uztea eta legez kanporatzea, eta komunikabideak ixtea sartzen dira. Hartara, batez ere Euskal Herriko testuinguruan, terrorismoaren aurkako legeria eta legeri hori betearazi behar duen auzitegia erabiltzen dituzte, biak ala biak zeharo salbuespenekoak.

Gure ustez, demokraziaren adierazlerik garrantzitsuenetako bat da gizarte zibilak zorrotz zaindu dezala giza eskubideak errespetatzen direla, eta herritarrek askatasun publikoak bultzatu eta defendatu ditzatela. Horregatik, beharrezkoa da, gure aburuz, eskubideen eta askatasunen eguneroko urraketari aurre egiten dioten eta estatu indarkeriaren biktimen alboan dauden mugimenduen existentzia. Gizarte zibilaren parte hartzea zilegia ez ezik ezinbestekoa da giza eskubideen urraketak salatzeko orduan eta arrazoi politiko edo sozialengatik zapalduta dauden ehunka pertsonekiko elkartasuna adierazteko orduan, bai Euskal Herrian, bai Espainiar Estatuan, bai munduko edozein txokotan.

Estatu indarkeriaren lekuko presentzialetako bat izatea da, historikoki, Amnistiaren Aldeko Euskal Mugimenduak bete izan duen papera, gizartean erabat erroturik. Sinetsita gaude, bada, lan hori suntsituz ateak irekitzen zaizkiela inpunitateari, estatu indarkeriaren biktimen indefentsioari, eta giza eskubideen urraketa berriei.

Horregatik, Amnistiaren Aldeko Batzordeen eta Askatasunaren aurkako 33/01 sumarioaren aurrean, bertan inputaturik dauden pertsonen aldeko elkartasuna adierazi gura dugu. Errepresioa salatzeko lana eta errepresioa pairatzen duten pertsonekiko elkartasun lana ezinbestekoak dira, eta geure egin nahi ditugu. Kriminalizazio dinamika honen behin betiko amaieraren alde agertu nahi dugu.

Horregatik, zein bere lan-esparrutik, orain azpijokoen bidez isilarazi nahi dituzten salaketa eta elkartasun jarrerak mantentzeko konpromisoa hartzen dugu.

Madrid, 2008ko ekainaren 09an

Acció dels Cristians per a l’Abolició de la Tortura (Països Catalans) • Alerta Solidària (Països Catalans) • Asociación Libre de Abogados (Madrid) • Asociación Contra la Tortura • Associació Memòria Contra la Tortura (Països Catalans) • Ateneu La Torna (Països Catalans) •Centro de Asesoría y Estudios Sociales CAES (Madrid) • Centro de Documentación contra la Tortura (Madrid) • CIEMEN (Països Catalans) • Comisión de Denuncia (Galiza) • Coordinadora contra la Marginació de Cornellà • Corriente Roja • Editorial Virus (Barcelona) • Espacio Alternativo • GGEBE-ADDSI Elkartea (Gipuzkoa) • Euskal Herriko Giza Eskubideen Behatokia • Grupo de Juristas 17 de Marzo (Andalucía) •Grupo de Solidaridad con Euskal Herría en Madrid • Grup de Treball 18/98 Barcelona • Gurasoak (Euskal Herria) • Observatori del Sistema Penal i els Drets Humans (Universitat de Barcelona) • PreSOS Galiza • Rescat (Països Catalans) • Salhaketa Bizkaia • Salhaketa Gasteiz • Saramaganta (Movemento Social Ourensán, Galiza) • Torturaren Aurkako Taldea -TAT (Euskal Herria) • Etxerat - Euskal Errepresaliatuen senitartekoen Elkartea • Euskal Herriko Abokatuen Elkartea Eskubideak • Santurtziko Torturaren Kontrako Taldea -TKT • CEIVAR-Organismo Popular Anti-repressivo (Galiza)

Hitzaldiaren kronika (gazteleraz):
(more…)